TANZANIA YAWANOA WATAALAMU WA HALI YA HEWA AFRIKA KUHUSU MATUMIZI YA RADA ZA HALI YA HEWA.

26 Agosti 2024, Mwanza, Tanzania: 

Katika kuwajengea uwezo wataalamu wa hali ya hewa kutoka Taasisi za Hali ya Hewa barani Afrika, Kitengo cha Elimu na Mafunzo cha Shirika la Hali ya Hewa Duniani kwa kushirikiana na Chuo cha Taifa cha Hali ya Hewa kinachoendeshwa na Mamlaka ya Hali ya Hewa Tanzania (TMA), wameandaa mafunzo mahsusi ya matumizi ya data na taarifa za Rada za Hali ya Hewa. Mafunzo hayo yanafanyika katika Ukumbi wa Malaika,Mwanza, tarehe 26 hadi 30 Agosti 2024.

Akifungua rasmi mafunzo hayo, Waziri wa Uchukuzi, Mhe. Prof. Makame Mnyaa Mbarawa (Mb); alieleza lengo la mafunzo hayo ni kuimarisha zaidi uwezo wa wataalamu wa hali ya hewa na wataalam wengine husika kutoka baadhi ya Nchi za Afika Mashariki na Kusini mwa Afrika katika matumizi bora ya taarifa za Rada za hali ya hewa kwa ajili ya kuboresha utabiri wa hali ya hewa na utoaji wa tahadhari za matukio ya hali mbaya ya hewa kwa jamii.

Aidha, alieleza kuwa mafunzo hayo yanaendana na utekelezaji wa mpango ulioasisiwa na Katibu Mkuu wa Umoja wa Mataifa wa utoaji wa Tahadhari kwa Wote (Early Warning for All EW4ALL) ifikapo mwishoni mwa mwaka 2027, pamoja na Sera ya Shirika la Hali ya Hewa Duniani (WMO) ya ubadilishanaji wa data za hali ya hewa Kimataifa (“WMO Unified Data Policy”). Mafunzo hayo yana umuhimu mkubwa kwa nchi wanachama wa WMO kanda ya Afrika (WMO RA1) katika kuongeza uwezo unaohitajika zaidi wa utoaji wa huduma za hali ya hewa na tahadhari kupitia taasisi za hali ya hewa za nchi husika kukabiliana na ongezeko la idadi na ukubwa wa matukio ya hali mbaya ya hewa katika muktadha wa mabadiliko ya hali ya hewa na hivyo kuchangia kuokoa maisha ya watu na mali zao.

Alisisitiza umuhimu wa kufanya uwekezaji wa miundo mbinu ya kisasa ya hali ya hewa kama vile rada, akifafanua kuwa Tanzania imekuwa kilelezo bora katika kufanya uwekezaji huo pamoja na kuwajengea uwezo wataalamu wa hali ya hewa nchini, na hivyo kuchochea fursa ya kuandaa mafunzo hayo.

Awali, Kaimu Mkurugenzi Mkuu wa TMA na Mwakilishi wa kudumu wa WMO, ambaye pia ni Makamu Mwenyekiti wa Jopo la Kimataifa la Sayansi ya Mabadiliko ya Hali ya Hew ana Tabianchi, Dkt. Ladislaus Chang’a, alieleza kuwa TMA imejiandaa vyema kupitia wataalamu wake katika kutoa mafunzo hayo “Wataalamu watakao toa mafunzo ni wabobezi, na kati yao wamepata mafunzo kutoka Marekani na Finland na vilevile ni wakufunzi kutoka Chuo Kikuu cha Dar es Salaam”. Alisema Dkt. Chang’a.

Kwa upande wake, Mwakilikishi kutoka WMO (Ofisi ya Mafunzo), Bi. Eunjin CHOI aliishukuru Serikali ya Tanzania kwa kufanikisha mafunzo hayo muhimu ya matumizi ya taarifa na data za rada za hali ya hewa. “Kupitia ushirikiano huu, kwa pamoja tunaweza kuendeleza malengo yetu ya kuboresha huduma za hali ya hewa, si tu kwa Tanzania bali duniani kote”. Alisisitiza Bi. Eunjin.

Tanzania inatoa mafunzo kwa wataalamu wa hali ya hewa kutoka baadhi ya nchi Wanachama wa Shirika la Hali ya Hewa Duniani (WMO) kanda ya Afrika ambao ni Burundi, Comoro, Jamhuri ya Kidemokrasia ya Kongo, Kenya, Msumbiji, Malawi, Mauritius, Rwanda, Seychelles, Sudan Kusini, Uganda, Tanzania na Zambia.

VULI 2024: MVUA ZINATARAJIWA KUANZA KWA KUSUASUA NA KUTAWALIWA NA VIPINDI VIREFU VYA UKAVU.

 

Dar es Salaam, 22/08/2024;

Mamlaka ya Hali ya Hewa Tanzania (TMA) imetoa utabiri wa msimu wa mvua za VULI 2024 kwa maeneo yanayopata mvua mara mbili kwa mwaka. Akizungumza wakati wa mkutano na vyombo mbalimbali vya habari, Kaimu Mkurugenzi Mkuu wa TMA na Makamu Mwenyekiti wa Jopo la Kimataifa la Sayansi ya Mabadiliko ya Hali ya Hewa na Tabianchi Dkt. Ladislaus Chan’ga alisema maeneo yanayopata mvua mara mbili kwa mwaka ni Mikoa ya Arusha, Manyara na Kilimanjaro, Mikoa ya Dar es Salaam, Pwani, maeneo ya kaskazini mwa mkoa wa Morogoro pamoja na visiwa vya Unguja na Pemba, Mikoa ya Kagera, Geita, Mwanza, Shinyanga, Simiyu na Mara pamoja na kaskazini mwa mkoa wa Kigoma.

Dkt Chang’a alisema mvua za Vuli kwa mwaka huu 2024 zinatarajiwa kuanza kwa kusuasua zikitawaliwa na vipindi virefu vya ukavu, aliongezea kuwa maeneo mengi yanatarajiwa kupata mvua za chini ya wastani hadi wastani huku vipindi vya  joto kali kuliko kawaida vikitarajiwa.

“Mvua za Vuli kwa mwaka huu 2024 zinatarajiwa kuanza kwa kusuasua,zikitawaliwa na vipindi virefu vya ukavu na mtawanyiko wake ukitarajiwa kuwa usioridhisha katika maeneo mengi, ingawa maeneo mengi yanatarajiwa kupata mvua za chini ya wastani hadi wastani japo izingatiwe kuwa matukio ya vipindi vifupi vya mvua kubwa yanaweza kujitokeza katika maeneo machache na vipindi vya joto kali kuliko la kawaida vinaweza kujitokeza”. Alisisitiza Dkt. Chang’a

Akizungumza kuhusu athari zinazotarajiwa kujitokeza, Dkt. Chang’a alisema upungufu wa unyevunyevu kwenye udongo unatarajiwa kujitokeza katika maeneo mengi, wadudu na magonjwa ya mazao yanatarajiwa kuongezeka, aliwashauri wakulima kutumia mbinu na teknolojia za kilimo himilivu za kuhifadhi maji na unyevunyevu wa udongo sambamba na kupata ushauri kwa maafisa ugani. Kwa upande wa mifugo alisema upungufu wa mvua unatarajiwa kuathiri upatikanaji wa maji na malisho kwa ajili ya mifugo, hali inayoweza kupelekea kujitokeza kwa migogoro baina ya wafugaji na watumiaji wengine wa ardhi kutokana na upungufu wa maji na malisho hivyo alishauri jamii kuweka mpango mzuri wa matumizi na uhifadhi wa maji pamoja na malisho.

Utabiri wa msimu wa mvua za vuli 2024 unapatikana katika ofisi zote za TMA nchini pamoja na mitandao ya mawasiliano kama vile TMA online TV, tovuti, blog, facebook na Instagram.

Kwa taarifa zaidi tembelea;  https://www.meteo.go.tz/uploads/publications/sw1724321444-Mwelekeo%20wa%20Mvua%20za%20Vuli%202024.pdf

TMA NA WANAHABARI WAJADILI NAMNA BORA YA KUFIKISHA UTABIRI WA MVUA ZA VULI 2024 KWA WANANCHI.

 

Dar es Salaam; Tarehe 21, Agosti 2024

Mamlaka ya Hali ya Hewa Tanzania (TMA) imekutana na wanahabari kutoka vyombo mbalimbali vya habari nchini ili kujadili utabiri wa msimu wa mvua za Vuli (Oktoba – Disemba ) 2024, katika ukumbi wa Chuo cha Taifa cha Usafirishaji (NIT), Dar es Salaam, Tarehe 21/8/2024.

“Warsha hii ni mwendelezo wa ushirikishwaji wa wanahabari katika kujadilli namna bora ya kufikisha taarifa sahihi kwa wananchi ili wajipange katika kuongeza tija na ufanisi wa utekelezaji wa shughuli mbalimbali za kiuchumi na kijamii na pia kukabiliana na athari zinazoweza kujitokeza kutokana na utabiri utakaotolewa” Alizungumza hayo Mgeni rasmi wakati akifungua warsha hiyo, Kaimu Mkurugenzi Mkuu wa TMA na Makamu Mwenyekiti wa Jopo la Kimataifa la Sayansi ya Mabadiliko ya Hali ya Hewa na Tabianchi, Dkt. Ladislaus Chang’a

Aidha, Dkt. Chang’a aliwashukuru wanahabari wote kwa mchango wao mkubwa katika kuhakikisha taarifa za hali ya hewa zinawafikia jamii kwa wakati na katika lugha inayoeleweka na kuongezea kuwa kupitia ushirikiano uliopo umepelekea mmoja wa wanahabari kutoka Channel Ten Bi. Dorcas Raymos kuambatana na Kaimu Meneja Masoko na Uhusiano Bi. Monica Mutoni kushiriki Mkutano wa Wadau wa Kikanda wa Maandalizi ya utabiri wa msimu Oktoba hadi Desemba 2024, Jijini Nairobi, Kenya na kuahidi kuendeleza ushirikiano huo pale fursa zitakapojitokeza.

Kwa upande wake mwakilishi wa wanahabari Ndg. Bernard Lugongo kutoka gazeti la Dailynews, alitoa mrejesho wa namna usambazaji wa Utabiri wa mvua za Masika 2024 ulivyokuwa mkubwa na kupelekea Serikali na wadau kushauri wananchi katika sekta zao katika kupanga mikakati mapema ya kukabiliana na athari zilizotarajiwa kujitokeza.

“Vyombo vingi vya habari nchini vilisambaza taarifa za Utabiri wa Masika 2024 na kutoa tahadhari zilizokuwa zikitarajiwa kujitokeza, lakini pia kupitia elimu ya sayansi ya hali ya hewa tuliyoipata ilifanya usambazaji kwenda mbali zaidi katika kuwa tahadharisha wadau pamoja na serikali kwa ujumla ili wapange mikakati katika kushauri wananchi namna bora ya kukabiliana na hali tarajiwa katika maeneo yao” Alisema Ndg. Lugongo

Kupitia Warsha hii, wanahabari walipata elimu ya uelewa kuhusu sayansi ya hali ya hewa na kufanikiwa kupitia rasimu ya utabiri wa hali ya hewa katika kipindi cha mwezi Oktoba hadi Disemba, 2024 unaotarajiwa kutolewa rasmi tarehe 22 Agosti 2024. Utabiri huo ni mahususi kwa maeneo yanayopata mvua mara mbili kwa mwaka ikihusisha mikoa ya Dar es Salaam, Pwani, Kaskazini mwa Morogoro, Visiwa vya Unguja na Pemba, Tanga, Kilimanjaro, Arusha, Manyara, Simiyu, Mara, Geita, Mwanza, Shinyanga, Kagera na Kaskazini mwa Kigoma.

WADAU WAHIMIZWA KUTOA MAONI YAO NA KUTEKELEZA MAAZIMIO YA MKUTANO IPASAVYO

 

DODOMA; Tarehe 19 Agosti, 2024;

Mamlaka ya Hali ya Hewa Tanzania (TMA), imekutana na wadau kutoka sekta mbalimbali nchini ili kujipanga na Utabiri wa Msimu wa VULI 2024 katika ukumbi wa PSSSF, jijini Dodoma, tarehe 19 Agosti, 2024.

Akifungua mkutano huo, Mwenyekiti wa Bodi ya TMA, Mhe Jaji Mshibe Ali Bakari, aliwahimiza wadau kutoka sekta mbalimbali walioshiriki katika mkutano huo kutoa maoni yao sambamba na kutekeleza maazimio ya mkutano yatakayoafikiwa.

” Tunapoelekea kutoa utabiri wa mvua za Vuli (Oktoba hadi Disemba), 2024 ninawahimiza wadau kutumia jukwaa hili katika kutoa michango ya maoni yenu kikamilifu ili kuleta tija kwa sekta mbalimbali nchini pamoja na kutekeleza maazimio yatakayofikiwa”. Alisema Mhe. Jaji Mshibe.

Mhe. Jaji Mshibe alisisitiza kuwa matumizi sahihi ya taarifa za hali ya hewa ni muhimu hususani katika kipindi hiki ambapo dunia pamoja na nchi yetu inakabiliwa na changamoto za mabadiliko ya hali ya hewa.

“Ninapenda kutoa msisitizo kwenu, katika majadiliano ya mvua za Vuli ya mwaka huu, 2024, mjikite katika kujadili namna ya kuimarisha matumizi ya utabiri wa hali ya hewa mtakaopewa na kushauri hatua stahiki za kuchukua”. Alisisitiza Mhe.Jaji Mshibe.

Akizungumza awali Makamu mwenyekiti wa Bodi TMA, Dkt Emmanuel Mpeta” ameipongeza TMA kwa kazi nzuri ya kuimarisha ubora na usahihi wa utabiri hususan katika kipindi hiki ambacho Dunia inakabiliwa na mabadiliko ya hali hewa, na kuwaomba wadau wa sekta mbalimbali kuwasilisha maoni yao ya kuimarisha ushauri kwa sekta na jamii.

Wakati akimkaribisha mgeni rasmi, Kaimu Mkurugenzi Mkuu, TMA na Makamu Mwenyekiti wa Jopo la Kimataifa la Mabadiliko ya Sayansi ya Hali ya Hewa na Tabianchi, Dkt.Ladislaus Chang’a aliishukuru Serikali kwa kuendelea na uwekezaji katika miundombinu ya hali ya hewa hapa nchini, alisema kupitia jitihada hizo, Mamlaka imeendelea kuboresha na kuimarisha huduma za hali ya hewa ikiwemo kutoa taarifa za utabiri wa maeneo madogo madogo kwa wilaya zote 86 za mikoa iliyopo katika ukanda unaopata mvua za Vuli na hivyo kusaidia katika kufanya maamuzi stahiki kwa lengo la kuongeza tija na kupunguza madhara ya hali mbaya ya hewa inapojitokeza.

“Niishukuru serikali na wadau wa maendeleo kwa kuendelea kuwekeza katika miundombinu ya hali ya hewa hapa nchini” Alisema Dkt. Chang’a.

Dkt. Chang’a aliendelea kusema kuwa mvua za Vuli ni mahsusi kwa maeneo yanayopata misimu miwili ya mvua kwa mwaka ambayo ni pwani ya kaskazini, nyanda za juu kaskazini mashariki, na ukanda wa Ziwa Victoria zenye mchango mkubwa katika sekta mbalimbali zikiwemo kilimo, nishati, maji n.k.

Aidha, ilielezwa kuwa taarifa sahihi za hali ya hewa pamoja na athari zake ni muhimu kupatikana kwa wote na kwa wakati ili kuwezesha jamii na wadau kujipanga na kuandaa shughuli za kiuchumi na kijamii katika maeneo yao.

Mamlaka ya Hali ya Hewa Tanzania, inatarajia kutoa taarifa rasmi ya msimu wa mvua za Vuli tarehe 22 Agosti 2024.

NAIBU WAZIRI UCHUKUZI ATEMBELEA BANDA LA TMA

 

Naibu Waziri wa Uchukuzi Mhe. David Kihenzile (MB) ametembelea banda la Mamlaka ya Hali ya Hewa Tanzania (TMA) katika kilele cha maonesho ya NaneNane 2024, Nzuguni, Dodoma.

DKT. CHANG'A AMESHIRIKI KATIKA UTOAJI ELIMU YA SAYANSI YA HALI YA HEWA KWENYE MAONESHO YA NANENANE 2024

Kaimu Mkurugenzi Mkuu wa Mamlaka ya Hali ya Hewa Tanzania (TMA) Dkt. Ladislaus Chang'a ameshiriki katika utoaji wa elimu ya sayansi ya hali ya hewa kwenye maonesho ya NaneNane 2024 katika Viwanja vya Nzuguni, Dodoma.

Dkt.Chang'a aliungana na wataalam wengine wa TMA katika muendelezo wa utoaji huduma za hali ya hewa nchini.

Aidha, Dkt. Chang'a alipata fursa ya kutembelea mabanda mbalimbali ya taasisi zilizo chini ya Wizara ya Uchukuzi.

Mamlaka inaendelea kuwakaribisha wananchi wote kufika kwenye banda la TMA, NaneNane Kitaifa.